Fréttir

06. febrúar 2015 14:53

Tíu milljónir króna til 14 nýsköpunarverkefna

Landsbankinn úthlutaði  10 milljónum króna í nýsköpunarstyrki til fjórtán verkefna úr Samfélagssjóði Landsbankans í gær. Hæsti styrkurinn nam 1,5 milljónum króna, fjögur verkefni hlutu eina milljón króna og níu verkefni 500.000 krónur hvert.

Nýsköpunarstyrkjum bankans er ætlað að styðja frumkvöðla til að þróa nýjar viðskiptahugmyndir, nýta eldri viðskiptahugmynd á nýju markaðssvæði eða skapa nýja vöru. Styrkirnir eru jafnframt ætlaðir til kaupa á efni, tækjum eða sérfræðiþjónustu vegna nýsköpunar eða til að sækja námskeið sem nýst geta í starfi.

 „Landsbankinn vill styðja við uppbyggingu og þróun frumkvöðlastarfs. Markmið bankans er að vera hreyfiafl og er það von okkar að styrkirnir sem við úthlutum  nú til margra áhugaverðra verkefna eigi eftir að skila sér margfalt til samfélagsins," segir Steinþór Pálsson bankastjóri.

Í dómnefnd voru Rögnvaldur Jóhann Sæmundsson, dósent við Háskóla Íslands, Óli Halldórsson, forstöðumaður Þekkingarseturs Þingeyinga, Finnur Sveinsson, sérfræðingur í samfélagsábyrgð hjá Landsbankanum, Inga Ásta Karlsdóttir, þjónustustjóri fyrirtækja hjá Landsbankanum á Akureyri. Yfir 250 umsóknir bárust um nýsköpunarstyrki Landsbankans að þessu sinni.

Eftirtaldir hlutu nýsköpunarstyrki að þessu sinni og óskar Landsbankinn þeim til hamingju og velfarnaðar með verkefni sín í framtíðinni.

Styrkur að fjárhæð 1.500.000 kr.

  • Inklaw ehf. - Framleiðsla og markaðssetning á íslensku fatamerki undir nafninu Inklaw Clothing.
Styrkir að fjárhæð 1.000.000 kr.
  • 4Fish ehf. - Þróun á sporðskurðarvél sem ætluð er til sporðskurðar á bolfiski.
  • BMJ Energy ehf. - Þróun á nettengdum stýribúnað og fjarmælikerfi fyrir litlar vatnsaflsvirkjanir.
  • Herberia ehf. - Þróun og markaðssetning á skráðum jurtalyfjum við vægum algengum sjúkdómum.
  • Medilync ehf. - Þróun einfaldrar og heildstæðrar lausnar til þessa að mæla og meta lyfjaþörf sykursjúkra.
Styrkir að fjárhæð 500.000 kr.
  • Axel Ingi Jónsson - Vefsvæði sem safnar saman upplýsingum um öll júdómót sem haldin eru.
  • Birkir Vagn Ómarsson - Þróun tölvuleiksins Future Habits sem ætlað er að nýta myndræna útfærslu til að kenna börnum að velja næringarríka fæðu.
  • Daði Freyr Ólafsson - Hönnun og þróun vefsíðunnar vaxtavextir.is sem býður upp á verðsamanburð á fjármálaþjónustu fyrir neytendur á Íslandi.
  • Hannes Þór Hafsteinsson - Vinnsla fæðubótaefnisins resveratról og annarra fjölfenóla úr íslenskum greniberki.
  • MURE ehf. - Þróun hugbúnaðar fyrir sýndargáttir (e. virtual reality headsets) sem ætlað er að minnka streitu og auka afköst fólks sem vinnur í opnum vinnurýmum.
  • Sigurást ehf. - Framleiðsla á umhverfisvænum fyrirburafatnaði og markaðssetning utan landsteinanna.
  • SuitMe - Þróun hugbúnaðar fyrir snjallsíma sem auðveldar fólki að kaupa föt á netinu.
  • V6 Sprotahús - Þróun nýrrar tegundar af hljóðmön fyrir borgarumhverfi framtíðarinnar.
  • Instafish - Þróun aðferðar við sölu íslenskra sjávarafurða á netinu sem gerir framleiðendum kleift að selja beint til neytanda með einfaldari hætti en áður.