Fréttir

18. desember 2015 13:24

Landsbankinn veitir tíu milljónir króna í samfélagsstyrki

Afhending samfélagsstyrkja
Styrkþegar samfélagsstyrkja Landsbankans ásamt dómnefnd.

Samfélagsstyrkjum að upphæð tíu milljónir króna var úthlutað úr Samfélagssjóði Landsbankans 16. desember sl. Alls hlutu 24 verkefni styrki að þessu sinni.

Verkefnin sem hlutu styrki eru afar fjölbreytt og styrkhafar koma víðsvegar að af landinu. Hæstu styrkirnir runnu annars vegar til gerðar heimildarmyndar um lífshlaup og ævistarf Páls Steingrímssonar, kvikmyndagerðarmanns sem ber nafnið Frá Heimaey til heimsenda og hins vegar til félagsins Einstrakra barna sem styðja foreldra langveikra barna.

„Það er ánægjulegt að Landsbankinn skuli verja hluta af hagnaði sínum til þeirra mörgu og fjölbreyttu verkefna sem unnið er að í grasrótinni á Íslandi. Öll þessi verkefni stuðla að því að bæta og efla samfélag okkar og fleiri verkefni ættu stuðning skilið,“ segir Guðrún Agnarsdóttir læknir en hún var formaður dómnefndar að þessu sinni.

Líkt og oft áður runnu margir styrkir til barna- og ungmennastarfs. Meðal slíkra verkefna sem hlutu styrk eru árlegar mælingar nemenda Hvolsskóla á Hvolsvelli á Sólheimajökli, Vertu með – verkefni til að virkja ungt fólk af erlendum uppruna sem er félagslega einangrað og frjálsíþróttadeild ÍR fékk styrk til að bjóða börnum flóttafólks að æfa frjálsar íþróttir.

Nánar um styrki úr Samfélagssjóði

Um 250 umsóknir bárust sjóðnum að þessu sinni. Þetta er í annað sinn á árinu sem samfélagsstyrkjum er úthlutað úr Samfélagssjóði bankans og samtals hafa 20 milljónir króna verið veittar í samfélagsstyrki árið 2015.

Samfélagsstyrkjum er einkum ætlað að styðja mannúðar- og líknarmál, menntamál, rannsóknir og vísindi, forvarnar- og æskulýðsstarf, sértæka útgáfustarfsemi og verkefni á sviðum menningar og lista.

Dómnefnd samfélagsstyrkja var að þessu sinni skipuð þeim Ármanni Jakobssyni, prófessor við Háskóla Íslands, Þórmundi Jónatanssyni hjá Landsbankanum og Guðrúnu Agnarsdóttur lækni, en hún var jafnframt formaður dómnefndar.

Samfélagsstyrkir Landsbankans – desember 2015

750.000 kr.

  • Einstök börn – Verkefnið „Frábærir foreldrar og sterkari fjölskylda en markmið þess er að veita foreldrum langveikra barna ráðgjöf og stuðning til að styrkja fjölskylduböndin.
  • Kvik ehf. – Frá Heimaey á heimsenda: Heimildamynd um lífshlaup og ævistarf Páls Steingrímssonar náttúruunnanda og kvikmyndagerðarmanns.

500.000 kr.

  • Anaconda-félagið – Vertu með, verkefni til að virkja ungt fólk af erlendum uppruna sem er félagslega einangrað.
  • ASSITEJ á Íslandi – UNGI - Alþjóðleg sviðslistahátíð fyrir unga áhorfendur.
  • Ástráður – Happadráttur - vitundarvakning um heilbrigt kynlíf.
  • Elísabet Ósk Vigfúsdóttir – Þróun á smáforriti með upplýsingum og ráðgjöf um allt sem snýr að meðgöngu, fæðingu og sængurlegu.
  • EPTA á Íslandi – Alþjóðleg ráðstefna Evrópusambands píanókennara (EPTA) sem haldin verður á Íslandi 2016.
  • Hróðmar I. Sigurbjörnsson – Tónlist og arfleifð Jóns Nordal.
  • Hvolsskóli – Árlegar jökulmælingar nemenda Hvolsskóla á Sólheimajökli.
  • Jón Steindór Valdimarsson – Smáforritið TravAble með handhægar upplýsingar fyrir hreyfihamlaða um aðgengi um þjónustu, byggingum og afþreyingu.
  • Ráðgjafar- og þekkingarmiðstöðin Berg – Upplýsingaveita fyrir foreldra og aðstandendur barna og ungmenna með tví- og fjölþættan vanda.
  • Pétur H. Ármannsson – Yfirlitsrit um ævi og störf Guðjóns Samúelssonar arkitekts og húsameistara ríkisins.
  • Samskiptamiðstöð heyrnarlausra og heyrnarskertra – Barnamenningarhátíð á degi íslenska táknmálsins.
  • Tabú – Námskeið um valdeflingu og sjálfsstyrkingu fyrir fatlaðar konur.

250.000 kr. styrkir

  • Dagur myndlistar/SÍM – Fræðsla um myndlist í framhaldsskólum á landsbyggðinni.
  • Frjálsíþróttadeild ÍR – Frjálsar hjá ÍR í boði fyrir börn flóttafólks.
  • Halldóra Arnardóttir – Listir og menning sem meðferð: „Hittumst á Listasafni Íslands.
  • Sólrún Inga Traustadóttir – Fræðslu- og rannsóknarverkefnið Grafið í hólinn.
  • Starfsfólk Háskólans á Akureyri – Fyrirlestraröð fyrir almenning um málefni flóttafólks.
  • Stofan – Þýðing á fræðsluefni fyrir unglinga með depurð og þunglyndi og útbúa handbók meðferðaraðila og vinnubók unglings.
  • Söngfjelagið – Guðríðarhátíð, tónlistarhátíð með samhljómi í íslenskri og arabískri tónlist.
  • Tinna Sigurðardóttir – Allir kennarar eru íslenskukennarar; netnámskeið til að fræða kennara um málþroska, málþroskaraskanir, tengsl málþroska við lestrarnám og áhrif þeirra á menntun.
  • Trans Ísland – Útgáfa og fræðsla um málefni transfólks.
  • Ungmennaráð UN Women á Íslandi – Fræðsla í skólum til að fræða ungmenni um starf UN Women.

Landsbankinn óskar styrkhöfum til hamingju með styrkina og velfarnaðar í framtíðinni.

06. desember 2019 15:18

Umræðan: Birkir Rúnar Gunnarsson - „Aðgengismál ekki svartagaldur fyrir örfáa“

Tæknin sem gerir símanum okkar kleift að skilja mannsraddir og gefa tækjunum okkar raddir hefur gjörbreytt lífi fólks með fötlun. Birkir Rúnar Gunnarsson, sérfræðingur í aðgengismálum, segir tækifæri tækninnar óviðjafnanleg en að það skipti öllu máli að gera hlutina rétt.


Nánar

05. desember 2019 10:36

Hagsjá: Hlutdeildarlán – ný lausn í mótun hjá stjórnvöldum

Stjórnvöld hafa boðað frumvarp um hlutdeildarlán sem er ætlað að auðvelda tekju- og eignalitlum einstaklingum að eignast íbúð. Í umfjöllun Unu Jónsdóttur, hagfræðings, kemur m.a. fram að markhópurinn þurfi að vera vel skilgreindur og séð til þess að stuðningurinn fari ekki til annarra en hann er ætlaður.


Nánar

22. nóvember 2019 13:37

Ekki hægt að skipta 500 evru seðlum eftir 5. desember

Landsbankinn mun ekki taka við 500 evru seðlum frá og með 5. desember nk. en útgáfu 500 evru seðla hefur verið hætt. Áfram verður hægt að skipta 500 evru seðlum í bönkum á evrusvæðinu, samanber meðfylgjandi tilkynningu Seðlabanka Evrópu.


Nánar